सुनको भाउ घटेर तोलाको ९० हजारमा झर्यो, अझै घट्न सक्ने

काठमाण्डाै । सुनको भाउ आज तोलामा ७ सय रुपैयाँले घटेको छ । आज सुनको भाउ तोलाको ९० हजार रुपैयाँमा झरेको नेपाल सुनचाँदी व्यवसायी महासंघले जनाएको छ ।

महांसघका पूर्व अध्यक्ष तेजरत्न शाक्यका अनुसार आज अन्तर्राष्ट्रिय बजारमा नै सुनको भाउ घटेको छ । अन्तर्राष्ट्रिय बजारमा सुन प्रति औंस आज १७ सय ७२ डलर छ । सुनको भाउ अझै घटेर १७ सय ५० डलरमा झर्न सक्ने अनुमान गरिएको शाक्यले बताउनुभयो ।

विश्वमा कोरोना विरुद्धको खोप बन्ने सम्भावना बढेपछि सुनको भाउ घट्न थालेको हो । विवाहको लगन सुरु भएसँगै सुनको भाउ घट्न थालेकाले कारोबार पनि बढेको छ ।

यसैबीच, चाँदीको भाउ पनि आज तोलामा ३० रुपैयाँले घटेर ११ सय २० रुपैयाँमा कारोबार भइरहेको छ ।