दाङमा कारागारबाट एक कैदी फरार

दाङ। दाङमा क्रतब्य ज्यान मुद्दामा २० बर्ष कैद फैसला भइ जेलमा रहेका एक ब्यक्ति फरार भएका छन । जिल्ला कारागार घोराहीको थुनामा रहेका जिल्लाको राजपुर गाउँपालिका बेलाका २७ बर्षीय जयराम परियार बिहीबार अस्पतालबाटै प्रहरीको मोटरसाईकल लगेर फरार भएका हुन ।

परियार छालाको उपचार गर्न भन्दै बिहान ११ बजेतिर प्रहरी जवान धनबहादुर चौधरीसंगै लु ३४ प ४१० नम्बरको मोटरसाइकल चढेर अस्पताल गएका थिए । उपचारका लागि भनेर हतकडी खोलेपछि परियार प्रहरी जवान चौधरीकै मोटरसाइकल लगेर भागेको भनिएपनि त्यसमा चौधरीको मिलेमतोको आशंका भइरहेको स्रोतले बताएको छ ।
प्रहरी जवान चौधरीलाई थुनामा राखेर अनुसन्धान भइरहेको जिल्ला प्रहरी प्रमुख एसपी सुरेश काफ्लेले जानकारी दिए ।परियारको खोजीमा प्रहरी परिचालन गरिएको जनाइएको छ ।