चिउरा मिलमा आगलागी हुंदा डेढ करोड बराबरको क्षति

मोरङ, ४ चैत । मोरङ एक चिउरा मिलमा आगलागी हुंदा झण्डै डेढ करोड रुपैयाँ बराबरको क्षती भएको छ। मोरङको पथरीशनिश्चरे नगरपालिकास्थित १ स्थित कर्णकुमारी लिम्बूको कोशी चिउरा मिलमा आगलागी भएको भएको हो।

शनिबार राति करिब १२ बजे सुरू भएको आगो नेपाल प्रहरी, सशस्त्र प्रहरी बल, वारूणयन्त्र र स्थानीयको सहयोगमा आइतबार बिहान साढे दुई बजेतिर नियन्त्रणमा आएको जिल्ला प्रहरी कार्यालय मोरङका प्रवक्ता तथा प्रहरी नायब उपरीक्षक रञ्जनकुमार दाहालले जानकारी दिए।

करिब १ करोड ७१ लाख बराबरको क्षति भएको प्रहरीले बताएको छ।

प्रहरीका अनुसार जस्तापाताको छाना भएको मिल काठ र इँटा प्रयोग गरेर बनाइएको थियो । मोरङ प्रहरी प्रवक्ता दाहालले आगोका करण मिलसहित २ सय मन गहुँ, २ सय मन भुस, ९० मन धान, ५० मन मकै, २० मन खुदी, २० मन चिउरा जलेर खरानी भएको बताए ।

उनका अनुसार आगलागीमा ४ वटा बंगुर पनि जलेका छन् । मिल नजिक बंगुर खोर रहेको हुँदा आगलागीको चपेटामा बंगुर पनि परेको उनले बताए ।

आगलागीको कारणबारे प्रहरीले अनुसन्धान गरिरहेको उनले जानकारी दिए।