खानेपानी उपभोक्ता महासंघको भेला

दाङ, १८ जेठ । खानेपानी तथा सरसफाई उपभोक्त महासंघ नेपालको पालिकास्तरीय भेला सम्पन्न भएको छ । सरसफाइ उपभोक्ता महासंघ नेपाल (फेडवासन ) दाङका अध्यक्ष धुर्व ठकुरीको अध्यक्षतामा भएको भेलामा सहभागीहरुले खानेपानीको दिर्घकालिन समस्या समाधानतर्फ ध्यान दिन जरुरी रहेको बताएका थिए।

कार्यक्रममा प्रमुख अतिथी समेत रहेका तुलसीपुर उपमहानगरपालिकाका नगरप्रमुख टिकाराम खड्काले खानेपानी समस्या समाधानका लागि नागरिक र सरकार उत्तिकै जिम्मेवार हुनुपर्ने बताएका छन् । स्थानीय सरकारले मात्रै खानेपानीको समस्या समाधान गर्न नसक्ने पनि दिर्घकालिन समस्या समाधानका लागि नागरिकको भूमिका पनि उत्तिकै रहने बताए ।

‘खानेपानीको समस्या विकराल बन्दै छ ।’ उनले भने ‘समस्या समाधानकालागि हामी एक्लैले केही गर्न सक्दैनौँ । यसमा नागरिकले पनि हामीलाई साथ दिन जरुरी छ ।’ जंगल फडानी र आगलागीका कारण पानीको मुहानहरु सुक्दै जानथालेको भन्दै उनले यसप्रति नागरिक सचेत र जिम्मेवार बन्न आग्रह समेत गरे।

पानीको अभावलाई केही हदसम्म कम गर्न वर्षायाममा पानी संचित गरी ड्याम निर्माण गर्नुपर्ने बताए । खानेपानीका संस्था आवश्यक भन्दा बढी भएको भन्दै मर्ज गरेर एकिकृत योजना निर्माण गर्न सकिने बताए।
डिभिजन खानेपानी कार्यालयका प्रमुख तिलक न्यौपानेले खानेपानीको लागी अधुरा साना साना योजना भन्दा अब ठुला योजना ल्याइ दीर्घकालीन रुपमा लग्नु पर्ने बताए ।

तुलसीपुर खानेपानीका अध्यक्ष यमकान्त भण्डारीले स्थानीय तहले पनि खानेपानीका लागी गम्भीर बन्न आग्रह गरे । स्थानीय तहले अहिलेसम्म पनि खानेपानीको लागि बजेट निकासा गरेको देखियको छैन अब यसमा ध्यान दिनुपर्ने बताए ।
छरछरे खानेपानीका अध्यक्ष गेहराज पौडेल , जुरपनिया मैनतारा खानेपानी सदस्य छवि घर्ती लगायतले बोलेका थिए।

पालिकास्तरीय समिति गठन
खानेपानी तथा सरसफाइ उपभोक्ता महासंघ नेपाल तुलसीपुरमा पालिका स्तरीय समिति गठन भएको छ । जसमा अध्यक्ष टेकबहादुर के.सि, उपाध्यक्ष आशा जि.सि, सचीव राकेश बस्नेत , कोषाध्यक्ष मधु कुमारी योगि, सदस्यहरुमा गेहराज पौडेल, कुन्ती बली, पुस्कर भण्डारी, पुर्ण बहादुर डाँगी, चन्द्रा वलि रहेका छन् ।