हेलिकप्टरमार्फत सुत्केरी र गर्भवती महिलाको उद्वार

रुकुमपश्चिम,२१ पुस। रुकुम पश्चिमको आठबिसकोट नगरपालिकाबाट २ जना महिलालाई हेलिकप्टरबाट उद्धार गरी सुर्खेत पठाइएको छ। एकजना सुत्केरी र एकजना गर्भवतीलाई उद्धार गरी सुर्खेत पठाइएको हो।

आठबिसकोट–२ पहाडाकी २४ वर्षीया धनमाया बुढा र वडा नं ३ खदीकी दीपा बोहरालाई नेपाली सेनाको हेलिकप्टरबाट प्रदेश अस्पताल सुर्खेत पठाएको आठबिसकोट नगरपालिकाका प्रवक्ता देवबहादुर घर्तीले जानकारी दिए।

उनका अनुसार दीपाले छोरीलाई जन्म दिइसकेपछि रक्तस्राव नरोकिएका कारण र गर्भवती बुढाको रक्तचापका कारण नगर अस्पतालमा उपचार सम्भव नभएपछि थप उपचारका लागि सुर्खेत पठाइएको हो।

विरामीको अवस्था गम्भीर भएपछि आठबिसकोट नगरपालिकाले जिल्ला प्रशासन कार्यालयलाई उद्धारका लागि अनुरोध गरेको थियो।

सो अनुरोधका आधारमा राष्ट्रपति महिला उत्थान कार्यक्रमअन्तर्गत हेलिकप्टरमार्फत गर्भवती तथा सुत्केरीको उद्धार गरिएको नगरपालिकाले जनाएको छ।