दाङ जाँदै गरेको पिकअप दुर्घटनाः चारजना घाइते

रोल्पा,२६ पुस। रोल्पामा पिकअप दुर्घटना हुँदा चारजना घाइते भएका छन् । सुन्तला बोकेर रोल्पाबाट दाङतर्फ जाँदै गरेको जिप दुर्घटना हुँदा चालकसहित चार जना गम्भीर घाइते भएका हुन् ।

उनीहरू सबैलाई गाडीले च्यापेको अवस्थामा उद्धार गरी उपचारका लागि दाङ पठाएको प्रहरीले बताएको छ। शुक्रबार बेलुका पौने ५ बजेतिर त्रिवेणी गाउँपालिका–४ सिमपानीमा लु १ च ८६८७ नम्बरको सुन्तला बोकेर दाङको तुलसीपुरतर्फ जाँदै गरेको जिप अनियन्त्रित भई दुर्घटना हुँदा झन्डै २५ मिटर तल खसेको थियो।

उक्त पिकअप जिप माडी गाउँपालिका– १ पेदीखोलादेखि सुन्तला बोकेर तुलसीपुर जाँदै थियो। उक्त दुर्घटनामा परी त्रिवेणी गाउँपालिका–४ की १४ वर्षीया दिलमाया घर्ती मगर, सोही ठाउँकी १२ वर्षीया सरिता घर्ती मगर, त्रिवेणी–२ नुवागाउँकी ११ वर्षीया करुण बाँठा मगरलाई पिकअपले च्यापेको अवस्थामा उद्धार गरी उपचारका लागि दाङको तुलसीपुरतर्फ पठाइएको रोल्पा प्रहरीले जानकारी दिएको छ।

अहिले पनि गाडीले च्यापेका चालकको उद्धारको प्रयास भने जारी रहेको रोल्पा प्रहरीले बताएको छ।