युवा स्वदेश फर्काउन नयाँ ढङ्गको काम आवश्यक : गृहमन्त्री

काठमाडौं, ४माघ ।उपप्रधान एवम् गृहमन्त्री नारायणकाजी श्रेष्ठले विदेशीएका युवालाइ स्वदेश फर्काउने वातावरण निर्माण गर्न जरुरी रहेको बताएका छन् ।बिहीबार स्वतन्त्र ऊर्जा उत्पादक सङ्घ (इप्पान)को २४ औं वार्षिकोत्सवलाई सम्बोधन गर्दै उपप्रधानमन्त्री श्रेष्ठले यस्तो बताएका हुन् ।

युवाहरु विदेशी पलायन भइरहंदा देशमा वृद्दाश्रमको संख्या बढ्दो देखिने संभावना रहेको भन्दै उनले युवालाइ पलायन हुनबाट रोक्न जरुरी रहेको बताए। यसका लागि नयाँ ढंगले काम गर्नुपर्ने उल्लेख गरे।

उनले युवालाई विदेश पठाएर देशलाई वृद्धाश्रम बनाउने खतराबाट मुक्त गरेरै छोड्ने प्रतिबद्धता समेत जनाएका छन् । देशलाई कुनै पनि हालतमा अल्पविकसित देशको अध्यक्ष भएकोमा गर्व गर्ने स्थितिमा नराख्ने बताए। उनले विदेश गएका युवाहरुलाई स्वदेशमै फर्काउन नयाँ ढङ्गबाट काम गर्नुपर्ने आवश्यकता रहेको औंल्याए।

उपप्रधानमन्त्री श्रेष्ठले उत्पादन वृद्धि, आयात प्रतिस्थापन र निर्यात वृद्धि गरेर व्यापार घाटा कम गर्ने दिशामा सरकार अघि बढिरहेको जानकारी दिए। उनले विकासको प्रक्रियालाई नयाँ र तीव्रतासहित अहिले सरकारले काम गरिरहरेको बताए । सुशासन प्रभावकारी बनाउने र अर्थतन्त्र सक्रिय बनाउने काममा सरकार लागिपरेको बताए।