विपन्न विद्यार्थीलाई लायन्सको सहयोग

दाङ, २ चैत । दाङ लायन्स क्लब अफ तुलसीपुर इसानले विपन्न विद्यार्थीहरुलाइ शैक्षिक सामग्री सहयोग गरेको छ। इसानले घोराही उपमहानगरपालिका -९ तेघरामा रहेको नरदेवी मावि तेघरामा अध्ययनरत विद्यार्थीहरुलाई शैक्षिक सामग्री वितरण गरेको छ ।

सामाजिक उत्तरदायीत्वको भावनाले क्लबले नरदेवी मावि तेघरामा आज एक कार्यक्रमको आयोजना गरी गरिव तथा जेहेन्दार वालवालिकालाई शैक्षिक सामग्री वितरण गरेको हो । शिक्षण सिकाइमा सहयोग पुगोस भन्ने उद्देश्यले विद्यालयका ५० बढि वालवालिकालाई झोला, कापी र कलम बितरण गरिएको क्लबका अध्यक्ष ऋषीराज भण्डारीले बताए ।

शैक्षिक सामग्री वितरण कार्याक्रममा बोल्दै अध्यक्ष भण्डारीले क्लबका साथीहरुबाट संकलित रकमबाट शैक्षिक सामग्री वितरण गर्दा वालवालिकामा देखिएको खुसीले हर्षविभोर भएको बताए । अझैपनि दुरदराजका सामुदायीक विद्यालयमा अध्ययन गर्ने वालवालिका शैक्षिक सामग्री किन्न पनि नसक्ने अवस्थामा रहेको र सोही कारण विचमै पढाइ छाड्न नपरोस भन्ने उद्देश्यका साथ वालवालिकाको अनुहारमा खुसी भर्नका लागि सानो सहयोग गरेको बताए ।

कार्यक्रममा विद्यालयका प्रधानाध्यापक कमल खड्काले विद्यालयले गरेको आग्रहलाई लायन्स क्लबले आत्मसाथ गरी विद्यालयका वालिवालिकालाई गरेको शैक्षिक सामग्रीले वालवालिकाको शैक्षिक सुधारमा महत्वपुर्ण भूमिका निर्वाह गर्ने बताए ।

लायन्स क्लब अफ तुलसीपुर इसानले ४५ हजार मुल्य बराबरको शैक्षिक सामग्री विद्यालयका वालवालिकालाई वितरण गरेको विद्यालयले जनाएको छ ।