मोटरसाइकल दुर्घटना: घाइते सन्दिपको पनि मृत्यु

दाङ,२६ मंसिर । मोटरसाइकल दुर्घटनामा परे घाइते भएका एक युवकको उपचारका क्रममा मृत्यु भएको छ। मृत्यु हुनेमा तुलसीपुर–४ घोरनेटीका १८ वर्षीय सन्दिप वली रहेको इलाका प्रहरी कार्यालय तुलसीपुरका सूचना अधिकारी तथा प्रहरी निरीक्षक प्रकाश थापाले जानकारी दिए ।

गत आइतबार तुलसीपुर–४ खाद्रे बनहरीबाट तुलसीपुरतर्फ आउदै गरेको लु।प्र।०२–००१ प १७१७ नम्बरको मोटरसाइकल तुलसीपुर–४ ठुला खाली नजिकै आफै अनियन्त्रित भएर रुखमा ठोक्किदा दुर्घटना भएको थियो ।

मोटरसाइकल सडक देखि ५ मिटर तल खसेर दुर्घटना हुदा चालकसहित ३ जना घाइते भएका थिए । घाइते मध्य दिपेन्द्र वलीको राप्ती प्रादेशिक अस्पताल तुलसीपुरमा उपचारकै क्रममा सोही दिन मृत्यु भएको थियो भने सन्दिपलाई थप उपचारका लागी नेपालगञ्ज रिफर गरिएको थियो ।

घाइते सन्दीपको उपचारकै क्रममा नर्सीङहोममा आज बिहान ६ बजेको समयमा मृत्यु भएको प्रहरी निरीक्षक थापाले बताए । उनका अनुसार दुर्घटनामा परी घाइते भएका मोटरसाइकल चालक तुलसीपुर–४ कल्लेखोलाका १७ वर्षीय गणेश खड्काको अहिले तुलसीपुर सिटि हस्पीटलमा उपचार भइरहेको छ।