एयरपोर्ट नजिकै दुर्घटना हुँदा दुईजना गम्भीर घाइते

दाङ,२८ पुस। दाङको तुलसीपुर उपमहानगरपालिका वडा नम्बर ६ एयरपोर्ट नजिकै सवारी दुर्घटना भएको छ। मोटरसाइकल र साइकल एक आपसमा ठोकिँदा दुईजना घाइते भएका छन्। घाइते दुवै जनाको अवस्था गम्भीर रहेको इलाका प्रहरी कार्यालय तुलसीपुरले जनाएको छ।

प्रहरीका अनुसार पुकार पसलबाट तुलसीपुर बजारतर्फ जाँदै गरेको रा २ प ५१५२ नम्बरको मोटरसाइकलले विपरीत दिशातर्फ जाँदै गरेको साइकल यात्रीलाई ठक्कर दिएको थियो।

मोटरसाइकलको ठक्करबाट साइकल यात्री तुलसीपुर उपमहानगरपालिका वडा नम्बर १६ ललौरा बस्ने अन्दाजी ४५ वर्षीय श्याम चौधरी र मोटरसाइकल चालक तुलसीपुर उपमहानगरपालिका वडा नम्बर १२टरीगाउँ निवासी ३० वर्षका दिनेश चौधरी घाइते भएका छन्। उनीहरू दुवैजनाको अवस्था गम्भीर रहेको प्रहरीले बताएको छ।

दुर्घटनामा परी अचेत अवस्थामा रहेका उनीहरूलाई स्थानीय वीरवल खड्का सहितकाले उद्धार गरी तुलसीपुरस्थित राप्ती प्रादेशिक अस्पतालमा पुर्याएका थिए। घाइते भएका उनीहरूलाई सामान्य उपचारपछि थप उपचारका लागि मेडिकल कलेज कोहलपुर रिफर गरिएको छ।

साइकल र मोटरसाइकललाई नियन्त्रणमा लिई घटनाको थप अनुसन्धान भइरहेको प्रहरीले बताएको छ।