स्ववियु निर्वाचन : उम्मेदवारको  मनोनयन दर्ता

दाङ, २७ फागुन ।
स्वतन्त्र विद्यार्थी युनियन (स्ववियु) निर्वाचनका लागि आज उम्मेदवारहरूको मनोनयन दर्ता सम्पन्न भएको छ। त्रिभुवन विश्वविद्यालयको कार्यतालिका अनुसार, फागुन २७ गते बिहान ११ बजेदेखि दिउँसो २ बजेसम्म प्रत्यक्ष तथा समानुपातिक तर्फका उम्मेदवारहरूले मनोनयन पत्र दर्ता गरेका हुन्।

यसअघि, फागुन २६ गते उम्मेदवारहरूको लागि मनोनयन पत्र वितरण गरिएको थियो। निर्वाचन समितिले उम्मेदवारहरूको प्रारम्भिक नामावली प्रकाशन गरेको छ । फागुन २८ गते उम्मेदवारविरुद्ध दाबी विरोध तथा छानबिन गरी अन्तिम नामावली प्रकाशन गरिनेछ। फागुन २९ गते उम्मेदवारी फिर्ता लिने समय तोकिएको छ।

स्ववियु निर्वाचन चैत ५ गते बिहान ८ बजेदेखि दिउँसो ४ बजेसम्म देशभरिका त्रिविका ६२ आङ्गिक र एक हजार ४० सम्बन्धन प्राप्त क्याम्पसमा सञ्चालन हुनेछ। यसपटकको निर्वाचनमा २८ वर्षे उमेर हद र मिश्रित निर्वाचन प्रणाली लागू गरिएको छ।