कर्णालीका मुख्यमन्त्री विरुद्ध अविश्वासको प्रस्ताव

सुर्खेत । कर्णाली प्रदेशका मुख्यमन्त्री महेन्द्रबहादुर शाहीविरुद्ध सत्तारुढ दल नेपाल कम्युनिस्ट पार्टी (नेकपा) कै सांसदले अविश्वासको प्रस्ताव दर्ता गराएका छन् ।

नेकपाका १८ जना सांसदहरुले आइतबार हस्ताक्षर संसदीय दलका प्रमुख सचेतक गुलाबजङ्ग शाहलाई बुझाएका  छन् ।

नेपालको स‌विधानको धारा १८८ को उपधारा ४ अनुसार प्रदेशसभामा तत्काल कायम रहेका सम्पूर्ण सदस्यको एक चौथाइ सदस्यले मुख्यमन्त्रीमाथि प्रदेशसभाको विश्वास छैन भनी लिखित रुपमा अविश्वास प्रस्ताव दर्ता गराउन सक्ने व्यवस्था छ । कर्णाली प्रदेशसभामा ४० जना सदस्य छन् ।

यसअनुसार अविश्वास प्रस्ताव दर्ता गर्न १० जना सांसद भए पुग्छ । कर्णाली प्रदेशसभामा नेकपाका ३३ सदस्य छन्, कांग्रेसको ६ र राप्रपाको एक जना रहेका छन् ।