घर फर्कन लागेका तुलसीपुरका रूपलाल: मलेसियाको एरपोर्टमै अस्ताए….

दाङ, २३ भदौ। वैदेशिक रोजगारीको सिलसिलामा मलेसिया पुगेका रूपलाल चौधरी (लालु)को मृत्यु भएको छ। तुलसीपुर उपमहानगरपालिका वडा नम्बर ११ बेलकनारका लालु भनेर चिनिने रुपलालको मलेसियाको एयरपोर्टमा मृत्यु भएको हो।
चार वर्ष अगाडि मलेसिया पुगेका उनी आज नेपाल फर्कँदै थिए । घर फर्कन लागेका चौधरीको कुवालालम्पुर एयरपोर्टमा मृत्यु भएको उनका नातेदार घनश्याम चौधरीले बताए।

चौधरीका नातेदार घनश्याम चौधरीका अनुसार एअरपोर्टमा बसिरहेको बेला अचानक लडेको खबर आएको थियो। उनलाई एअरपोर्टमै मृत घोषणा गरिएको थियो।

चौधरी नेपाल फर्कनका लागि बोर्डिङ पास लिएर प्रतीक्षारत अवस्थामा थिए। तर, घर पुग्न नपाउँदै उनको असामयिक निधन भएको छ।

मलेसियामा मृत्यु भएपछि उनका परिवार शोकमा डुबेका छन्। परिवारका सदस्यलाई चौधरीको मृत्यु हृदयघातबाट भएको जानकारी प्राप्त भएको छ। मृतक चौधरीको शव नेपाल ल्याउने प्रक्रिया बारेमा परिवारमा चिन्ता बढिरहेको छ।