त्रिशुली दुर्घटना : बेपत्ता चालक र सहचालक खोज्न गोताखोर परिचालन

धादिङ,२३ मंसिर । पृथ्वी राजमार्गअन्तर्गत धादिङको बेनीघाट रोराङ गाउँपालिका(२ स्थित कृष्णभीरबाट आज (आइतबार) बिहान त्रिशूली नदीमा ग्यास बुलेट खस्दा बेपत्ता चालक र सहचालकको खोजीमा सशस्त्र प्रहरीको गोताखोर परिचालन गरिएको छ।

चितवनबाट काठमाडौँतर्फ जादै गरेको एनएल-०२एल-३९०७ नम्बरको भारतीय ग्यास बुलेट अनियन्त्रित भई सडकबाट करिब ६० मिटर तल त्रिशूली नदीमा खसेको हो।

जसमा परी चालक भारतको बरुनी निवासी अन्दाजी ४५ वर्षीय पंकज कुमार र सहचालक बेपत्ता छन्। सहचालकको भने परिचय खुलिसकेको छैन।

सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटार र विपद् व्यवस्थापन बेस आदमघाटबाट सशस्त्र प्रहरी नायब उपरीक्षक अश्विनकुमार गुरुङको नेतृत्वमा गोताखोरसहित विपद् व्यवस्थापन तालिम प्राप्त सुरक्षा फौज परिचालन गरिएको सशस्त्र प्रहरी बलका सहप्रवक्ता डीएसपी शैलेन्द्र थापाले जानकारी दिए।