नेपाली राष्ट्रिय क्रिकेट टोली भारत प्रस्थान: लिग- २को तयारी गर्ने 

दाङ २८ साउन ।  सेप्टेम्बरमा क्यानडामा हुने विश्वकप लिग-२ को त्रिकोणात्मक सिरिजको तयारीका लागि नेपाली राष्ट्रिय क्रिकेट टोली भारत प्रस्थान गरेको छ। टोलीले बैंगलोरस्थित प्रतिष्ठित नेशनल क्रिकेट एकेडेमी (एनसीए) मा दुई हप्ता प्रशिक्षण गर्ने कार्यतालिका रहेको छ।

नेपालले लिगको दोस्रो श्रृङ्खलामा ओमान र घरेलु टोली क्यानाडाको सामना गर्नेछ। घरेलु मैदानमै भएको पहिलो श्रृङ्खलामा नेपालले चार खेलबाट एक जित निकाल्दै २ अंक मात्र जोडेको छ। नेपालले नेदरल्यान्ड्स र नामिबिया सम्मिलित सिरिजमा फेब्रुअरी २७ मा भएको खेलमा नेदरल्यान्डलाई ९ विकेटले हराएको थियो। बाँकी तीन खेलमा भने नेपाल पराजित भयो।

विश्वकप लिग-२ अंकतालिकामा अहिले नेपाल छैटौं स्थानमा रहेको छ। लिगमा ७ खेल खेलेको स्कटल्यान्ड ९ अंकका साथ शीर्ष स्थानमा रहँदा ५ खेलबाट क्यानडा र ८ खेलबाट नामिबिया समान ८ अंकका साथ दोस्रो र तेस्रो स्थानमा छन्। 

नेदल्यान्डस् ५ खेलबाट ६ अंकका साथ चौंथो स्थानमा रहँदा ४ खेलबाट ओमान ३ अंकका साथ पाँचौँ स्थानमा रहेको छ। नेपालभन्दा पछि युएई ३ खेलबाट शून्य अंक साथ सातौँ र खेल नखेलेको अमेरिका आठौँ स्थानमा रहेको छ। नेपालले केही दिनअघि मात्र क्यानडामा हुने त्रिकोणात्मक सिरिजका लागि २२ सदसिय खेलाडीको प्रारम्भिक टोली घोषणा गरेको थियो।