ट्रक दुर्घटना हुँदा एकजनाको मृत्यु

पाल्पा,१३ कार्तिक । पाल्पाको अहाखोलामा ट्रक दुर्घटना हुँदा एक जनाको मृत्यु भएको छ। पाल्पाको रम्भा गाउँपालिका -३ अगाहाखोलास्थित सिद्धार्थ राजमार्गमा ट्रक दुर्घटना हुँदा चालकको मृत्यु भएको जिल्ला प्रहरी कार्यालय पाल्पाका प्रहरी नायब उपरीक्षक सुनिल मल्लले जानकारी दिएका छन । उपरीक्षक मल्लका अनुसार मृत्यु हुनेमा रम्भा गाउँपालिका ३ निवासी २३ वर्षीय भुवन सिंह राना रहेका छन।

बुटवलबाट पोखरातर्फ जाँदै गरेको लु १ ख ९३५१ नम्बरको ट्रक अनियन्त्रित सोही दिशातर्फ जाँदै गरेको ना १ क ७१२१ नम्बरको ट्रकलाई पछाडिबाट ठक्कर दिदा राना घाईत भएको प्रहरीले बताएको छ।

ट्रक सोमबार राति ११ बजे दुर्घटना भएको थियो। घाइते रानाको लुम्बिनी मेडिकल कलेज प्रभासमा उपचारको क्रममा मृत्यु भएको थियो।

रानाले चलाएको ट्रकले ठक्कर दिदा ना १ क ७१२१ नम्बरको ट्रकका सहचालक स्याङ्जा बालिङ नगरपालिका १० का २१ वर्षिय सन्जित खवास थापा घाइते भएका छन भने चालक बालिङ ९ का ५६ वर्षिय गुप्त बहादुर गुरुङ सकुशल रहेको प्रहरीले बताएको छ। घटनाको थप अनुसन्धान भैरहेको प्रहरीले बताएको छ।