नेपालमा हुने त्रिदेशीय फुटबल प्रतियोगिताको तालिका सार्वजनिक

काठमाण्डाै । नेपाल, बङ्गलादेश र किर्गिस्तानले खेल्ने त्रिदेशीय फुटबल प्रतियोगिताको तालिका सार्वजनिक भएको छ । काठमाण्डौको दशरथ रङ्गशालामा चैत १० गते बङ्गलादेश र किर्गिस्तानले उद्घाटन खेल खेल्ने अखिल नेपाल फुटबल सङ्घ (एन्फा) ले जनाएको छ । 

यस्तै नेपालले चैत १२ गते किर्गिस्तान र १४ गते बङ्गलादेशसँग खेल्नेछ । फाइनल खेल चैत १६ गते हुने तालिका छ । सबै खेल बेलुकी साढे पाँच बजे दशरथ रङ्गशालामा हुनेछ । 

प्रतियोगितामा नेपाल र बङ्गलादेशकाे सिनियर राष्ट्रिय टोलीको सहभागिता हुने भए पनि किर्गिस्तानको भने २३ वर्षमुनिको टोली सहभागी हुनेछ । 

विश्वकप छनाेटअन्तर्गतका घरेलु मैदानमा हुने खेल स्थगित भएपछि नेपालले मैत्रीपूर्ण खेलको आयोजना गरेको हो ।